Os empresarios piden regula-la velocidade na rúa Aduana

A Asociación de Empresarios de Ponteceso solicitou a adopción de medidas para limita-la velocidade do tráfico na rúa Aduana que da acceso ó casco urbán dado que alí conflúen un cambio de rasante, un paso de peóns e mais o cruce que leva á Casa do Concello ó que lle hai que suma-la alta velocidade ca que chegan a este punto os vehículos tra-la recta de Lestemoño e a subida da Bouza. Así reclaman a instalación de semáforos reguladores ou bandas rugosas.

Leer en español »

A Confraría de Corme ofrece once novas prazas de percebeiro

A Confraría de Corme, coa autorización da Consellería de Pesca, ofrece once novas prazas para mariscar (permex) que cubriran as baixas producidas por xubilación e outras causas. Sete delas son para capturas a flote e as outras catro para o traballo a pé. As bases están expostas no taboleiro de anuncios da Confraría, débese ter feito o curso de mariscador e o prazo para presenta-la documentación para obte-lo permiso de explotación remata mañán.

Por outra banda, a Confraría promove unha charla para a tarde do mércores 5 de setembro sobre resíduos mariños a cargo de persoal da Fundación Biodiversidade e do Centro Tecnolóxico do Mar de Vigo e especialmente dirixida ós armadores, que terá lugar nas súas dependencias.

Leer en español »

En setembro comezarán as obras para terminar de cimenta-la EDAR de Ponteceso

Cando se construiu a mediados dos anos 90 a Estación Depuradora de Augas Residuais de Ponteceso no Xungal, xunto con oito kilómetros de colectores, só se pilotou a parte central na que se atopan as zonas de decantación e biodepuración polo que agora están a ceder parte do colector xeral, o pozo de entrada e o muro de peche provocando importantes gretas debido ó afundimento desas zonas. Segundo explicou o alcalde, leva dous anos reclamando unha solución que agora asume a Consellería de Medio Ambiente presupostando 404.185€ para un proxecto de actuación hidráulica de emerxencia para solventa-la elevada contaminación microbiolóxica mediante obras de saneamento adxudicadas á empresa Fergo Galicia a desenvolver durante o mes de setembro sen data concreta. Se ben esta empresa xa trouxo material de obra para o traballo, os técnicos da mesma ainda hoxe non saben se empregarán técnicas de micropilotaxe, pilotaxe ou lousas.

Leer en español »

Exposición sobre Jesús Núñez en Ponteceso

Dende o 25 de setembro ata o 9 de outubro Ponteceso acollerá a exposición sobre o pintor, escultor e gravador de Betanzos Jesús Núñez Fernández no IES Ponteceso.

[Información remitida polo Dto. de Prensa do Concello]

Leer en español »

O Sporting Ciudad gañou o torneo de veteranos

O equipo coruñés Sporting Ciudad resultou vencedor do torneo de fútbol veterano ”La Amistad” celebrado o pasado domingo no Pinguel ó impoñerse ó San Román na tanda de penaltis da final logo dun empate a dous. O Nantón quedou terceiro despois de gañarlle ó Camariñas, cuarto, que levou para casa o trofeo á deportividade. O trofeo para o máximo goleador do torneo foi para Mata, xogador do Nantón.

Leer en español »

Finalmente “Nazón de Breogán” recalará no Couto

Se xa publicamos no seu día que a exposición ”Nazón de Breogán” se achegaría ó concello polo centenario do himno galego, faltabanos por sabe-lo lugar escollido para o evento. Pois ben, segundo o Concello, o lugar elixido é a Casa dos Veciños do Couto.

Leer en español »

Aberto o prazo de matrícula na Galescola de Ponteceso

Os pais de nenos menores de 3 anos aceptados tra-la preinscipción teñen de prazo ata o vindeiro xoves día 30 para formaliza-la matrícula de cara ó presente curso na Galescola de Ponteceso, que deberá estar rematada en outubro, ata completa-las 40 prazas dispoñibles.

Prema nesta ligazón para acceder á información oficial ofrecida pola Vicepresidencia da Xunta ó respecto »

[Actualización] Parece ser que finalmente o prazo de matrícula rematará este xoves día 6 de setembro.

Leer en español »

Avance das Festas da Barquiña 2007

Chéganos información do que van se-las festas da Barquiña deste ano, organizadas pola AC Río Anllóns coa colaboración do Concello de Ponteceso.

Así pois, as celebracións escomezarían o venres 7 de setembro co Festival Rock Anllóns coa participación de Loretta Martin, Overcrounz facendo hip-hop dende A Coruña, Rockers Go To Hell dándolle ó rock, tamén de Coruña, Skarmento tocando punk-rock dende Lalín e máis Justicieros de Buño, facendo rock. O festival inclúe churrascada, sorteo dunha guitarra eléctrica e entrada de balde. Éste é o cartel que nos enviaron e que xa vimos pegado esta fin de semana en diferentes puntos da comarca:

Seguindo co aspecto musical do programa da Barquiña, tódalas orquestas contratadas pertencerían á empresa Sito Mariño Espectáculos, de Arzúa. Deste xeito, o sábado 8 a sesión vermú estaría amenizada pola orquesta Los Player’s e pola noite verbena con ésta mesma e a orquesta Galicia. O domingo 9 tocarían Solera e Grupo Cabaret, o luns 10 o espectáculo correría a cargo de Compostela e Los Trovadores e, o martes 11, pecharían as festas a orquesta Los Satélites e Midas.

Ademáis, haberá xogos no río, concertos de corais, música tradicional, fogos de artificio, teatro…

[Actualización] Adrián tivo a deferencia de enviarno-lo cartel das festas:

Dado que esta nova se irá retrasando co paso dos días, creamos unha páxina permanente na cabeceira da web para un rápido acceso ó programa festivo.

Comeza a construcción da nova sede social da AC Río Anllóns

O novo edificio da asociación cultural Río Anllóns ten un orzamento de 1,1 millón de euros e contará con sótano, pranta baixa e primeiro piso nunha superficie útil de 1.800 metros cadrados que se ubicará nunha parcela de 10 ferrados entre a casa de Pondal e o aserradoiro, pola que se tivo que facer un desembolso de 198.000 euros acadados ó través dun crédito. No sótano preténdese instalar un spa con servicios de piscina, baño turco, ximnasio…, na pranta baixa iría un salón de actos con capacidade para duascentas persoas e unha cafetería, e na pranta alta habilitaríanse oficinas, biblioteca e sala de lectura. O tellado deseñaráse con paneis que capten a enerxía solar e moi posiblemente se aproveite a enerxía xeotérmica do chan da zona para abarata-los custos de mantemento do local.

Nun primeiro momento plantexouse a posibilidade de amplia-lo edificio actual, o que foi imposible por mor do programa de ampliación do dominio público marítimo-terrestre do Ministerio de Medio Ambiente. Tra-lo acordo ó que se chegou coa Dirección General de Costas del Estado, a entidade cultural cede o antigo local do paseo fluvial a cambio dunha indemnización de 553.000 euros que non recibirá ata finais de ano. Asimesmo, o programa Agader outorgará unha subvención de 197.000 euros.

Leer en español »

Hoxe varía a rota do Noitebús

Por mor das Festas do Mar de Malpica, a rota do Noitebús que vencella Camariñas con Ponteceso amplíase para chegar ata Malpica. Deste xeito, o percorrido desta noite será Camariñas-Ponte do Porto-Vimianzo-Baio-Laxe-Ponteceso-Malpica-Corme-Ponteceso-Malpica con saída ás 23:30h. e volta ás 6h. dende Malpica a Corme e ás 6:30h. dende Malpica a Camariñas. Os cambios no traxecto, como é lóxico, só afectan a esta noite e logo voltarán á normalidade. Para máis información ó respecto pódese chamar á Compañía Metropolitana de Transportes da Coruña mediante o 981 25 41 45.

Leer en español »

Ponteceso contará con sete áreas de carga e descarga

As sete zonas de carga e descarga que habilitará o Concello distribuiránse do seguinte xeito: unha na avenida de Anllóns, unha na rúa Vereda, tres na avenida Eduardo Pondal, unha na rúa Aduana e outra na avenida de Bergantiños. Estas zonas facilitarán a carga e descarga de mercadoría sen obstaculiza-la circulación.

Mención aparte merece a rúa Aduana: entre o incremento de habitantes nesa rúa dende hai anos, así como a apertura de talleres de costura ou máis recentemente o permiso para construir un tanatorio sen aparcamento, propicia que os conductores por mor da falla de espacio para estacionar se vexan na obriga de deixa-los coches sobre a bairarrúa ou levalos ata A Bouza. Unha zona de carga e descarga non vai mellora-la situación.

Leer en español »

O Concello traballa para instalar unha rede WiMAX

O alcalde, a concelleira de Cultura e o concelleiro de Turismo reuníronse hoxe pola mañán con enxeñeiros da empresa Quobis Networks, empresa galega de telecomunicacións, para estuda-la instalación dunha rede WiMAX no Concello de Ponteceso. Esta rede estaría preparada para ofrecer servicio de Internet a tódolos veciños e poder así acabar coas barreiras que teñen moitas parroquias do noso Concello para poder acceder á Internet de alta velocidade. Este servicio sería ofrecido de igual maneira a todos: empresarios, estudiantes, traballadores, institucións e turistas accedendo á rede mediante usuario e contrasinal que ofrecería o Concello nas súas dependencias. Trátase dunha iniciativa punteira en Galicia xa que non existe máis que un Concello na actualidade que conte cun proxecto destas características, O Caurel, pero aínda non o puxeron a andar. As velocidades de WiMAX superan con creces as da tecnoloxía WiFi acadando velocidades de 70Mbps e unha cobertura de 48km de radio. Esta tecnoloxía permitirá tamén reforza-los sevicios que ofrece a Oficina Municipal de Corme para que os veciños poidan tramitar dende alí calquera documentación que agora deben facer no Concello.

[Información remitida polo Dto. de Prensa do Concello]

Prema aquí para obter maior información sobre a tecnoloxía WiMAX.

Leer en español »

Costas extenderá tamén a senda peonil pola costa de Ponteceso

Se onte nos preguntabamos se habería xeito de que a senda peonil que ha descurrir polo litoral de Malpica chegase a Ponteceso, hoxe descubrimos que de feito será así, trala reunión mantida onte entre os técnicos de Demarcación de Costas e o alcande Fondo Aguiar, se ben esta información non se publicou ata hoxe na web do concello que está sendo reprogramada nestes intres por unha empresa de Carballo. A intención sería, entón, darlle continuidade á senda de Malpica ata chegar a Corme, unirá Valarés coa Barra, Osmo coa Ermida e incluirá traballos no malecón do Río Anllóns nas proximidades do casco urbano de Ponteceso. Espérase que o proxecto definitivo esté listo para finais de ano.

Leer en español »

O Concello elabora un censo de muiños

O alcalde de Ponteceso, José Luis Fondo, anunciou onte que o Concello está a elaborar un censo dos muiños de auga do municipio en visos de inicia-la súa restauración o vindeiro ano e lembrou que en anos anteriores xa se recuperaran dous en Bardaio e un en Tella.

Leer en español »

Este sábado escomeza o San Roque en Corme

Este sábado, e durante catro días, os veciños de Corme celebrarán o San Roque. O mesmo sábado haberá verbena a cargo das orquestas Bahía Blanca e Añoranza. O domingo, día do Sacramento, haberá pasarúas a cargo da Banda Eduardo Pondal, misa solemne ás 12h., concerto da banda de Ponteceso na praza da Ribeira ás 13h. xunto a unha exhibición de baile tradicional a cargo do grupo Chorima, sesión vermú por parte de Tony Pérez e Os Arquiños e verbena por parte destes últimos e maila orquesta D’Moda. O luns de San Antonio haberá pasarúas por parte do grupo de gaitas de O Couto, misa ás 12h., sesión vermú por parte de Los Almirantes, pola tarde xogos para os nenos coa organización do Concello de Ponteceso, así como a entrega de premios ós disfraces máis orixináis do Entroido xunto co desfile das majorettes de Corme e, para rematar, verbena protagonizada por Los Almirantes e Tango. O martes do San Roque, misa de 12, sesión vermú coa orquesta Players e verbena a cargo desta mesma xunto con Amistad de Vigo.

Leer en español »

O torneo de fútbol veterano “La Amistad” desputaráse o domingo en O Pinguel

Segundo Gerardo Suárez, presidente da Agrupación Cultural Deportiva de Veteranos de Ponteceso, o vindeiro domingo desputaráse o torneo de fútbol veterano ”La Amistad” coa participación dos equipos de Ponteceso, Nantón, Cabana, Club do Mar, Deportivo Carballo, Camariñas, Sporting Ciudad, San Román, Sofán e, posiblemente, o Baio. O torneo terá lugar das 9 ás 19 horas no campo de fútbol O Pinguel de Ponteceso.

Leer en español »

Este domingo clausúrase a Escola de Verán da AC Monte Branco

O vindeiro domingo remata a Escola de Verán organizada pola AC Monte Branco de O Couto celebrando un festival con exposicións de pintura, representacións teatrais, danzas do mundo, baile moderno e maila actuación do dúo Orballo.

Leer en español »

Martín Varela gaña o Open Internacional de Bélxica

O cormelán, que non para, gañoulle a final do segundo cadro individual do Open Ath de tenis en cadeira de rodas ó belga Kristof Michils por 7-6, 2-6 e 7-6. Martín Varela tamén chegou á final de dobres do segundo cadro na compaña do catalán Oliver Puras pero non a puido desputar dado que á mesma hora saía o seu avión de regreso e a organización do evento non quixo adiantar a hora do encontro para non altera-lo programa da competición.

Leer en español »

Ponteceso e Corme, sen pediatra en agosto

Dende mediados deste mes, os pais de Ponteceso e Corme deben leva-los seus fillos ós consultorios de Cabana e Laxe para seren atendidos dado que a pediatra titular da praza atópase de vacacións dende o día 16 desde mes e ata principios de setembro, sen que o Segas nomeara persoal sustituto.

Así pois, para obter a atención dun pediatra, os luns hai que achegarse ata As Revoltas de 9 a 14 horas e o resto da semana, pódese acodir ó centro de saúde de Cabana de 9 a 11 horas e ó de Laxe de 11 a 14 horas. Segundo o Concello de Ponteceso, estes días estivéronse a recibir infindade de chamadas de veciños para queixarse e esixir solucións. O Concello deu traslado ás mesmas ó Sergas onde aseguran que non poden facer nada porque non hai persoal médico dispoñible.

Leer en español »

Aparatoso accidente marítimo en Corme

Polo que lemos en Corme.net, onte pola tarde un mozo cormelán colisionaba coa súa embarcación contra unha das bateas do polígono cormelán. A pesares do aparatoso do accidente, o mozo recuperáse favorablemente das feridas ocasionadas.

Leer en español »