Aberta ó tráfico a estrada Ponteceso-Malpica

Esta tarde-noite remataron os traballos nas dúas pontes da estrada Ponteceso-Malpica antes do anunciado. Se ben se dicía que a ponte que queda á altura da Bouza ía estar lista para o domingo e a do Pinguel non o estaría ata a vindeira semana, finalmente non foi así co que a estrada quedou xa plenamente aberta ó tráfico. Ubicáronse uns bidóns para que os coches non abeiren demasiado e así evitar que se estropee o traballo realizado. Como é obvio, compre circular con precaución neses puntos. Asemade foi retirado o panel informativo que, nun alarde de incompetencia sen par, se ubicou durante case dúas semanas na saída da curva que da acceso á rúa Aduana sobre a mesma vía e que por sorte só provocou uns cantos freazos e outros tantos volantazos.

Novo asfalto en Ponteceso

Dende onte estáse a fresar e asfaltar o tramo co firme máis deteriorado da avenida Eduardo Pondal no casco urbán de Ponteceso. Tamén se botou asfalto no acceso á futura Galescola sita en Canesteves.

[Actualización] Os traballos de asfaltado quedaron rematados.

Aprobada a construcción da EDAR de Corme

O Consello da Xunta aprobou onte a construcción da depuradora de Corme que se ubicará na Canteira, con capacidade para abastecer a 3.000 habitantes e cun orzamento de 1.606.208 euros aportados pola Empresa Pública de Obras e Servizos Hidráulicos. O prazo de execución e explotación a cargo da empresa adxudicataria é de doce meses, con outros dous meses máis para a redacción definitiva do proxecto, que en breve sairá a concurso. O mencionado proxecto está encadrado no Plan de Saneamento da Consellería de Medio Ambiente e Desenvolvemento Sostible desenrolado para cumpri-la normativa europea que esixe estacións de tratamento de augas residuais en núcleos de máis de 2.000 habitantes.

O plan de saneamentos para Corme inclúe a recollida dos resíduos que a día de hoxe se están a verquer na Arnela, a modificación dos colectores da Praza da Ribeira, un novo sistema de bombeo dende o porto ata a depuradora e máis a separación do Rego do Cairo do resto da rede.

As axudas do plan Agader

Éste é o destino no concello de Ponteceso das subvencións para proxectos dinamizadores das áreas rurais de Galicia que a Consellería de Medio Rural vén de convocar ó través do Plan Agader:

Casa dos Veciños en Brántuas

Tra-la cesión dos terreos, a Asociación Cultural Nosa Señora do Faro de Brántuas construirá unha Casa dos Veciños orzamentada en 127.032 euros dos que Agader sufragará 67.072,90 euros.

Museo de Arte Contemporánea en Corme

A Fundación Torre-Pujales vai recibir 80.000 euros para o acondicionamento do futuro Museo de Arte Contemporánea da Costa da Morte na rúa Real de Corme, ainda que precisarán dun investimento total de 300.000 euros polo que seguen na procura doutras vías de financiación. Lembramos que o Concello tivo que lles prorroga-la licencia de obras por seis meses máis debido á falta de fondos da Fundación e os retrasos nas obras que eso acarrea.

Universidade Rural Eliseo do Mato no Couto

A Asociación Cultural Monte Branco do Couto recivirá de Agader 50.958,62 euros dos 94.895 euros orzamentados para a contrucción da Universidade Rural Eliseo do Mato que estará ubicada na primeira pranta da Casa dos Veciños e que ha contar con pizarra dixital, cañón, ordenadores e demáis adiantos tecnolóxicos. Tamén se vai crear un parque infantil así como a transformación do bar nun salón de actos para a presentación de libros e diversas actividades culturais.

Rota “Val Nativo” sobre Pondal

A Fundación para o Desenvolvemento de Bergantiños proxecta a rota “Val Nativo”, con saída e chegada na casa de Eduardo Pondal que pasará pola Agra do Couto, pola futura sede da Fundación Pondal, subindo polo Monte Branco e para baixar polo malecón antes de chegar ó punto de saída. O percorrido ronda os tres kilómetros e seguirá unha senda de fitos marcada con mehires. Agader aporta 21.866 euros dos 33.640 que custa o total do proxecto.

Peche de inscricións nas Xornadas sobre o Himno

Hoxe remata o prazo de inscricións nas Xornadas do Centenario do Himno Galego que se han celebrar na Casa dos Veciños do Couto do 18 ó 20 de decembro e que tiveron unha grande acollida desbordando tódalas espectativas.

Cea cas Amas de Casa de Ponteceso

A Asociación de Amas de Casa de Ponteceso vai celebrar unha cea-baile o vindeiro sábado 8 de decembro no restaurante A Lagoa de Vimianzo. Os interesados en participar han pasarse pola tenda Biquiños antes do día 4 ou ben o xoves polo local da Asociación.

“Só te teño a ti” na Casa do Mar de Corme

Hoxe ponse fin ó Ciclo de Cine Social organizado pola AVV Eduardo Pondal de Corme coa proxección do filme “Só te teño a ti” a partires das dez da noite na Casa do Mar, con entrada de balde.

O Acontecer, número 11

Neste número só lle adican unha páxina á información de Ponteceso polo que pasan de puntiñas polo ocorrido no pleno ordinario do luns, as axudas da Deputación para a Confraría de Corme, os cursos de internet do Concello e, a xeito de guía de ocio, un pequeno artigo no que repasan varias citas co lecer cas que desfrutar nesta semana.

[Prema aquí para descargar O Acontecer, número 11]

Dúas persoas serán dadas de baixa no padrón de Ponteceso

Segundo unha resolución da Alcaldía que saiu publicada no BOP de onte, 28 de novembro, incóase o trámite de baixa de oficio no padrón de habitantes de Ponteceso dos cidadáns Ramón Ures Varela, de Pazos, e de Claudina Oviedo Rodríguez, de Corme Porto, por non residiren no concello a maior parte do ano. Os interesados dispoñen de quince días a contar dende onte para presentar alegacións.

[Prema aquí para acceder ó texto completo da resolución 327/2007 do 7 de novembro]

Unha das pontes da estrada a Malpica debería estar lista para o domingo

Polo que publica hoxe a Voz de Galicia citando como fonte a Fondo Aguiar, as obras na travesía da saída de Ponteceso cara Malpica tardarán varios meses en seren rematadas pero estáse a tentar que cando menos unha das pontes quede lista para o derbi Ponteceso-Corme do vindeiro domingo e que os coches poidan achegarse ata o campo do Pinguel. A segunda ponte prevése que se abra ó tráfico no transcurso da vindeira semana.

A voltas co sinal perigoso da Aduana

De cumprírense as previsións, o sinal perigoso chantado en plena saída da curva que da acceso á rúa Aduana para avisar do corte da estrada a altura da Bouza, obstruíndo medio carril e obrigando a invadi-lo contrario facendo unha manobra perigosa, perdurará no mesmo sitio unha semana máis.

O mencionado cartel pasou todo o domingo sobre a beirarrúa despois de que na madrugada algún conductor aproveitase a nocturnidade para sacalo do medio da estrada. O luns a primeira hora reubicárono de novo pero aínda máis cara o centro do carril. Na tarde do martes, ás 18:25 horas, un coche da Garda Civil de Tráfico estivo a punto de bater con el: tras deixar recua-lo vehículo coas luces acesas quedáronse mirando cara o sinal un anaco ata que decidiron continua-la marcha e deixar queda-lo cartel como estaba. Vése que ía frío abondo desa hora. Policía Local e Garda Civil tamén teñen que esquiva-lo obstáculo a diario.

Poñe-lo cartelón nas proximidades deste outro de aquí abaixo, nun sitio no que hai espazo para da-la volta, aínda non se lle ocorreu a ningún dos responsables de te-lo posto ahí… ou de non te-lo quitado. Disporán dunha semana máis para te-la ocorrencia:

O problema para a seguridade vial que supón o sinal só foi denunciado aquí. Ningún dos medios que se achegou para tirar fotos das obras ou asistir a plenos se dignou a adicarlle unha soa liña.

Agader subvenciona con 80.000 euros ó Museo de Arte Contemporánea

Información publicada na noite de onte en Corme.net:

A Axencia de Desenvolvemento Rural, dependente da Consellería do Medio Rural da Xunta de Galicia, vén de conceder o pasado 26 de Novembro unha subvención por importe de 80.000 euros para a rehabilitación da casa museo que a Fundación Torre-Pujales ten na Rúa Real. Esta subvención é crucial para a posta en marcha do Museo de Arte Contemporánea da Costa da Morte.

Comunicado do PSOE sobre o abandono do pleno

O PSOE de Ponteceso ven de difundir un comunicado para xustifica-lo abandono do pleno o pasado luns despois de que o grupo de goberno aprazase as preguntas e mocións dos socialistas para un vindeiro pleno excudándose en que non as tiveran presentado a tempo. No comunicado acusan ó alcalde de tentar silenciar á oposición e de “poñerlle soldo a seis concelleiros se logo é el quen quere controlar todo.

Lamentamos que o PSOE local non nos teña en conta para nos remitir información nin comunicado algún polo que só podemos por os extractos que do debandito comunicado publicou a prensa no día de hoxe:

En democracia ten que existir diálogo e ter en conta á oposición.

As mocións deberían terse debatido e aprobado para poñerse canto antes a traballar para non seguir co retraso que levamos desde que vostede é alcalde.

O alcalde non se aclara porque di que antes o PSOE non presentaba mocións e agora que as presenta non as contesta. Antes dicía que as preguntas tiñan que ser por escrito, agora son por escrito e tampouco as contesta. Ao alcalde non lle interesa que se saiba nada do Concello, nin que os veciños asistan aos plenos, por iso os puxo ás 9 da mañán.

Abandoamos o pleno porque entendemos que se non se contestan as nosas preguntas non estamos nunha democracia, estamos nunha dictadura.

Tenis: hoxe dous enfrontamentos

Esta noite despútanse os dous últimos partidos da segunda xornada da Liga de Tenis Municipal: ás 20:30 horas xogan Alfonso Romar e Héctor Cruz e ás 21:00 horas faráno Jorge Añón e José Manuel Mato.

O Corme CF debe decidir se cede o seu campo ó Concello

A xunta directiva do Corme C.F. ven de prantexarlle ó concelleiro de Cultura Turismo e Deportes, Nuñel Costa, que lle solicite á Deputación Provincial a instalación de céspede sintético no Cairo acolléndose ó programa provincial de axudas para a implantación de campos de fútbol de herba artificial. Para elo é requisito imprescindible que o Corme C.F. lle ceda o campo ó Concello polo que convocaron ós máis de trescentos socios da entidade a unha xuntanza o vindeiro 6 de decembro para que decidan sobre da iniciativa da xunta.

Se aceptan a cesión, a empresa Naos sería a encargada da redacción do proxecto. Técnicos da mesma estiveron onte no Cairo e aseguraron que se ía desprazar o terreo de xogo un metro cara os banquiños, alonxándoo das bancadas e conservando as mesmas medidas.

Mellora no tendido eléctrico ata O Pinguel

En resposta a unha pregunta prantexada polo BNG no pasado pleno, Fondo Aguiar asegurou que o Concello aproveitará as obras de beirarrúas e sendas peonís que se están a realizar na Bouza ata O Pinguel para deixar instalada unha liña de media tensión que palie os constantes fallos no suministro eléctrico que padece decote o campo de fútbol e que chegaron a obriga-lo uso dun grupo electróxeno.

O Concello encarga o proxecto para o local social do polígono

A pesares de non estar presente na visita de onte do delegado de Industria ó polígono da Mezquita o alcalde expresou o seu apoio ó empresarios e asegurou que o Concello se encargará do proxecto do local social e indicou que xa a semana pasada se firmara un contrato coa empresa Naos para tal fin.

Excursión a Vigo coa Coral San Eleuterio de Tella

A coral polifónica San Eleuterio de Tella, volve a ser elixida para actuar no Festival de Panxoliñas, organizado pola Fundación Caixa Nova, en Vigo. Convidamos a todo aquel que queira acompañarnos. A viaxe sae de balde mentras non superemos as plazas do autocar. Logo, convén reservar praza. Pódese facer mediante un mail a: cantatella @ gmail.com, poñéndose en contacto con calquer membro da coral, deixando unha mensaxe neste blog, antes do día 5 de decembro, logo que a actuación será o día 8 de decembro. Saída de Tella as 10 horas e regreso ás 11 horas do serán, dando un paseo, logo dun bo xantar, pola cidade de Vigo.

[Visitar sitio web da Coral]

Actividades para a prevención da SIDA en Ponteceso

O día 1 de decembro de 2007 celébrase o Día Mundial da SIDA, polo que o concello de Ponteceso pon en marcha unha campaña de prevención do VIH/SIDA que consiste en repartir e colocar polo concello (centro médico, paneis informativos, oficinas municipais, concello e  IES) carteis e folletos informativos sobre o tema facilitados pola Xunta de Galicia. Tamén se distribúe información e preservativos a cada un dos alumnos que cursan o bacharelato, ciclos formativos e educación de adultos no I.E.S. de Ponteceso.

Imaxes dos cursos de iniciación a internet

De seguido, dúas imaxes dos Cursos de Iniciación a Internet que o Concello de Ponteceso organiza en Corme e Ponteceso os luns e martes. Estes cursos están encadrados dentro do Plan de Alfabetización Dixital (PAD) que inclúe diversas medidas para a inserción plena da sociedade pontecesán dentro do mundo das novas tecnoloxías a través de cursos, conferencias e medidas xurdidas dende a propia administración local.

[Fotos cedidas polo Concello de Ponteceso]

Por se durante o curso se pasaran por esta páxina: un saúdo a todos!

Fútbol sala: resultados da terceira xornada

Éstes son os resultados da terceira xornada da Liga Municipal de Fútbol Sala que organiza o Concello e se desputa cada sábado:

SAN XULIÁN 2-4 AUTOS POMBO
TINTÁN 1-8 SÚPER RAMA
PLAYA DE NIÑÓNS 5-5 RÁFAGA O BARRIL
SERGESCO 1-5 GRUPO ELYTE
PUB BURRITA 0-7 BAR PAULA
CONSTRUC. CORDOBÉS 6-1 BIPELO
DRINKING TEAM 2-9 AC MONTE BRANCO
FALDRA FOLK 6-3 CAFÉ-BAR ALDEOLA

Despois de tres partidos lidera a clasificación Bar Paula con 21 puntos por diante de AC Monte Branco con 20 puntos seguido de Grupo Elyte con 16 puntos.