Ponteceso no móbil

Vimos de estrear unha nova funcionalidade WAP mediante a cal poderás acceder á portada coas últimas vinte entradas de 500P.com dende calquera sitio e a calquera hora empregando o teu teléfono móbil. Tan só debes entrar en

wap.500p.com

O móbil non ten por qué ser de última xeneración, abonda con que teña soporte WAP. Se tes dúbidas achégate ó establecemento onde o mercaches e pregunta, ainda que hoxe en día e prácticamente imposible atopar un sen WAP.

Se ben se poden ver normalmente as entradas e opinións, a versión WAP non permite interactividade nin contén imaxes ou vídeos. O motivo é que se poida acceder á información dende tódolos móbiles ainda que non sexan modelos recentes.

O acceso é gratuito pero se cadra a operadora que che da o servizo de telefonía si que che cobre. Algunhas compañías ofrecen tarifa plana para navegar e só cobran a descarga de xogos e politonos; outras cobran 50 céntimos a primeira conexión e o resto do día é de balde… mesmo hai algunha que cobra segundo a cantidade de información que descargues ó móbil. Se non coñeces as tarifas, chámaos e pregunta: teñen a obriga de informarte.

Para acceder dende un PC é preciso empregar algún navegador que soporte WAP, como Opera, ou usar un emulador.

Sobre o acontecido no pleno de onte

Aprobouse o Plan de Obras e Servizos (POS) para o 2008 coa abstención de PSOE e BNG, ainda que se enclúen algunhas das propostas do Bloque, cos seguintes proxectos de pavimentación vial:

• En Langueirón, dende a estrada xeral ata o igrexario, 52.831 euros
• En Cores, camiño de Santa Cruz a estrada de Cruceiro e camiño de Fonte das Pombas, 34.214 euros
• En Corme:
  • De Aldea do Roncudo ata zona alta de Regadiña, 52.492 euros
  • De A Pedra á rúa Boqueta Carril, con valado, 53.352 euros
  • Tramo Atalaia - estrada do Roncudo e do camiño Cruceiro a Fonte dos Ánxeles (Brántuas), 36.520 euros
• En Niñóns, camiño de Canleiro e, en Brántuas de Abaixo, camiño de Rocheira, 47.990 euros

O alcalde salientou como razoables as propostas do BNG por seren obras prioritarias malia ser imposible metelas todas no POS mentres que calificou de “panfleto” as do PSOE por, segundo Fondo Aguiar, non se adaptaren nin ás bases nin ós cartos dispoñibles xa que sería preciso un millón de euros para levalas a cabo. Os socialistas respostaron que debería le-las bases da convocatoria para saber qué obras se poden incluír e as que non e lembrou que algunhas das súas propostas xa foran incluidas noutros plans co seu voto a favor.

Aprobouse a modificación dos estatutos da Fundación Eduardo Pondal por unanimidade despois de que a secretaria explicara que se trataba dunha cuestión de formas para adapta-lo regulamento á nova Lei de Fundacións de Interese Galego.

Aprobáronse por unanimidade as propostas para apoia-la candidatura da Torre de Hércules a ser proclamada Patrimonio da Humanidade ó igual que achegarlle os parabéns a Dolores Bolay por ter sido elixida presidenta do parlamento de Xenebra.

O asunto da permuta inmobialiaria aprazouse ata un vindeiro pleno por non teren presentado os promotores toda a documentación a tempo.

Mocións

A moción do BNG sobre o cambio climático, que incluía medidas de aforro enerxético e a elaboración dun plan específico así como retrasa-lo prendido do alumeado do Nadal, foi rexeitada aducindo que o Concello se atopa vinculado xa a plans de outras administracións e que mesmo os comerciantes piden que se adiante o encendido do mencionado alumeado.

Outra moción do Bloque en apoio ás reivindicacións dos veciños de Tella foi aprobada por unanimidade polo que os tres grupos lle expresarán a súa oposición á Consellería de Política Territorial sobre da pavimentación recén realizada e pediránlle que rebaixe o nivel da estrada á altura das casas así como a construcción de beirarrúas de verdade. O alcalde asegurou que deberían expropia-la marxe dereita en dirección Carballo coa fin de cederlla ó Concello para facer beirarrúas e aparcamentos.

En canto ás mocións do PSOE, Fondo anunciou que as mocións e preguntas deste grupo habían quedar para o vindeiro pleno ordinario por teren sido presentadas o venres e non poder te-las miradas ata o día de onte (chegou a asegurar que se enterou das mesmas pola prensa), reprochándolles que xa tiña advertido no pleno anterior que a oposición debería presentarlle as mocións e preguntas con maior antelación a fin de darlle tempo dabondo para examinalas e prepara-las respostas. Foi entón cando os tres ediles socialistas abandoaron o salón de plenos en sinal de protesta. O portavoz do grupo, Mato Pet, declarou o seguinte:

O Goberno tenta poñer trabas á oposición cos horarios dos plenos e actitudes como ésta. O sábado é día hábil e cúmprense as vintecatro horas de rigor. Ademáis, o alcalde cobra un bo soldo, teñen tres dedicacións exclusivas e cada membro do goberno percibe 612€ ó mes, polo que aínda que teñan que facer algunha hora de máis non é tanto esforzo.

O PSOE retirándose do pleno [FOTO: cibeira - lavozdegalicia.es]

Rogos e preguntas

Respostas ós interrogantes plantexados polo BNG:

Sobre a construcción do centro de día, o alcalde asegurou que o Concello se interesou por contar con esta instalación a través de contactos coa Xunta e coa Deputación ós que se lle ofreceron terreos sitos entre o centro de saúde e o intituto, estando a día de hoxe á espera de novas por parte de Vicepresidencia da Xunta, quen por boca de Carmen Aldán, secretaria xeral de Igualdade, fixo saber que ofrecerían resposta a curto prazo.

Sobre a Galescola, Fondo Aguiar rexeitou responsabilidades no retraso na súa apertura.

Anunciouse que a casa de cultura deberá estar rematada a mediados de 2008.

Sobre os sendeiros litorais, o alcalde indicou que Ponteceso foi incluído no proxecto do Ministerio de Medio Ambiente cun tramo entre A Barra e Anllóns. Cando Suso Lista se interesou polo proxecto anunciado por Touriño sobre o tramo costeiro de Muros e Laxe e unha posible inclusión de Ponteceso, Fondo aclarou que polo de agora só é unha simple declaración de intencións e que en caso de concretarse solicitaráse que conten con Ponteceso.

En canto ó segundo médico de Corme, o alcalde explicou que mantivo xuntanzas cos veciños e coa delegada provincial así como o envío de escritas á consellería recibindo por toda resposta que non hai médicos dabondo.

Sobre as obras do gas en Corme e a preocupación dos veciños que xa adiantaron cartos á empresa, Fondo aclarou que a concesionaria solicitou dous permisos: un para a canalización e outro para o depósito, ámbolosdous concedidos se ben o do depósito depende agora das Consellerías de Industria e Medio Ambiente.

Explicouse que as obras de sendas peonís e bairrarúas ata o Pinguel que está a construir a Deputación non inclúen rede de saneamento pero que o Concello prentende poñer canalización ata a curva da Agra de Lestemoño sen que sexa preciso que a obra afecte ós traballos que se están a realizar na actualidade.

O alcalde tamén informou que as obras da EDAR de Corme serán contratadas antes de que remate o ano e as de mellora da de Ponteceso xa foron adxudicadas.

Onte, día de visitas en Ponteceso

Sobre a visita de Pablo Vvillamar, vicepresidente da Deputación da Coruña

O vicepresidente da Deputación achegouse na tarde de onte ata Corme e reuniuse cos dirixentes da Confraría para facer entrega de 38.000 e 5.000 euros para a posta en marcha da venda de percebe por internet. O patrón maior indicou que estudiarán xunto ca Universidade da Coruña e coa empresa Abertal de Carballo para comercializa-lo percebe na rede, despois de teren rexistrada a marca Percebe do Roncudo e estaren traballando nun proxecto de etiquetado e deseño dun logotipo. A Deputación tamén fixo entrega de outros 17.000 euros complementarios para tentar salva-lo pósito da quebra económica despois de quedaren cun só vixiante e teren que face-los propios mariscadores turnos de vixiancia.

Logo Villamar achegouse ó Couto para ve-las obras da que será a Futura sede da Fundación Eduardo Pondal na remozada casa rectoral e anunciou que estará listo en febreiro tras un investimento de 300.000 euros dos que 240.000 corresponden ó Plan de Dinamización Turística e o resto ó Concello.

Sobre a visita de José Luis Barcia, delegado de Industria

Tamén na tarde de onte o delegado de Industria, xunto con representantes de Xestur, achegáronse ata o polígono industrial da Mezquita de Tella para unha xuntanza coa xunta de propietarios na que constatou a necesidade dunha ampliación do parque industrial, mellora-lo suministro eléctrico en varias parcelas da parte traseira do polígono, voltar a medir e dar nova división a dúas ou tres parcelas que ainda están por vender e nas que a superficie real non coincide coa do proxecto, así como a construcción dun local social na parcela propiedade da entidade. O delegado amosouse receptivo ás demandas e comprometeurse a estudia-la posibilidade de subvenciona-las obras precisas a cargo do orzamento da consellería do vindeiro ano.

O vicepresidente da Deputación visita Ponteceso

Pablo Villamar, vicepresidente da Deputación da Coruña, visita Corme esta tarde ás catro e media para facer entrega do material para a Base Náutica. De volta, recalará no Couto para ve-las obras de restauración da rectoral que será sede da Fundación Pondal e que avanzan con retraso.

Tentativa de suicidio en Ponteceso

Un rapaz de Carballo foi atopado por un veciño despois de tentar suicidarse na mañán de onte, preto do polígono da Mezquita de Tella, intoxicándose con monóxido de carbono tras uni-lo escape co habitáculo do coche cunha goma e deixando o vehículo prendido. Unha ambulancia do 061 atendeuno en primeira instancia e doulle traslado ó Juan Canalejo.

Imaxes: “Pim Pam Pum” na A.C. Río Anllóns

De seguido, catro imaxes tiradas na representación de “Pim Pam Pum” o sábado na A.C. Río Anllóns a cargo de Mona Lisa Teatro dentro do Ciclo de Teatro e que, segundo fontes do Concello, xuntou duascentas persoas:

[Fotos cedidas polo Concello de Ponteceso]

Fútbol: resultados da pasada fin de semana

No grupo 2 da 2ª autonómica o Ponteceso venceu 0-1 ante o Montelouro fóra da casa e segue segundo da clasificación tra-lo Cee que fixo o propio. O Corme endosoulle ó Buño no Cairo unha malleira en forma de 6-2 e sube ata o séptimo posto empatado a puntos co Baio.

Na liga de veteranos, o Ponteceso gañou o derbi fronte o Corme por 3-1 co que se pon terceiro do grupo A relegando ó Corme á oitava praza.

En canto ós xuvenís, tamén o Ponteceso veceu no derbi co Corme por 0-2 cousa que os deixa quinto e séptimo, respectivamente, na táboa do grupo norte.

Asuntos que se abordarán no pleno de mañán

Os seguintes asuntos hanse tratar no pleno ordinario convocado para mañán luns ás nove da mañán:

* Aprobación da acta da sesión anterior.

* Aprobación das actuacións do Plan de Obras e Servizos:

O equipo de goberno proporá destiña-los 277.405 euros do POS para melloras viarias coma o asfaltado da pista da Atalaia á estrada do Roncudo, pista dende a Regadiña ata a Panadería, pista dende a Agra de Rodríguez á Regadiña, finalización do camiño dende A Pedra ata Candelajo en Corme; tramo da estrada xeral ó Iglesario en Langueirón; camiños de Fonte das Pombas e de Canleiro en Niñóns; camiño dende o cruceiro ata a Fonte dos Ánxeles e ampliación do camiño de Rocheira en Brántuas.

* Proposta de apoio á declaración da Torre de Hércules como Monumento Patrimonio da Humanidade da Unesco.

* Aprobación dunha permuta inmobiliaria:

Proporáse a permuta dunha finca municipal no Monte da Facha, de solo rústico pertencente á Rede Natura entre Valarés e Corme, por outra privada entre o polideportivo e o cemiterio de Corme. Os propietarios do terreo pretenderían crear aló un coto de caza mentres que o Concello disporía de terreo para un futuro auditorio. (Segundo a Voz de onte, este punto terá que agardar a un vindeiro pleno por non aportaren os propietarios toda a documentación a tempo).

* Aprobación da modificación dos Estatutos da Fundación Eduardo Pondal.

* Mocións.

* Pregos e preguntas.

PSOE: segunda fase do polígono e feira semanal

Presentarán unha moción para que o Concello solicite a segunda fase do polígono industrial da Mezquita e propoñen que a venda de parcelas inclúa unha cláusula fixando un prazo para edificar, así coma estudiar cos actuais propietarios da primeira fase a posibilidade de edificar as parcelas baleiras. Tamén se tratará sobre da construcción dunha nave propia para estaciona-los diversos vehículos do Concello que andan espallados polo municipio.

Noutra moción proporán por converti-la feira da Trabe nun mercado semanal.

Tamén se interesarán por saber se o muro que se está a levantar en Os Agrelos, Corme, ten licenza, sobre das xestións para sintonizar laSexta e a TDT, cánto se ten investido na Feira das Fabas, cánto se destiña ó mantemento de colexios, qué plans ten o goberno para a base de Protección Civil, cándo se vai a arranxar a rúa dos Cuñarros en Tella, a relación de obras que se solicitaron a Política Territorial, etc.

BNG: travesía de Tella e apagóns no campo de fútbol

Presentarán unha moción para que tódolos grupos firmen unha escrita para facerlle ver a Política Territorial que todos están contra a pavimentación recentemente realizada, así coma solicitar que se rebaixe a cota da estrada e a creación de beirarrúas reais.

Noutra moción pedirán ó Concello que adopte medidas para o aforro enerxético e a concienciación cidadá sobre o mesmo.

Tamén se han interesar en saber sobre dos apagóns que se dan decote no campo de fútbol do Pinguel, as xestións do Concello para a promoción turística, se haberá un centro de día, por qué non se fixeron as obras previstas para a EDAR, cándo se abrirá a Galescola, qué pasa co segundo médico de Corme, etc.

Curtametraxe: “A morte ten un prezo [200 euros]”

Curtametraxe coprotagonizada por Suso Lista:

Obras de canalización na Mezquita

Fondo Aguiar, alcalde de Ponteceso, reuniuse onte na Coruña cos delegados provinciais das Consellerías de Innovación e Industria para asina-los convenios precisos para levar a cabo a canalización do parque empresarial da Mezquita cun orzamento de 65.000 euros.

[Actualización]

José Luis Barcia Picos, delegado de Industria, visitará o parque empresarial a principios da vindeira semana. A xunta de propietarios aproveitará para pedirlle, entre outras cousas, axuda para renova-la canalización eléctrica e a construcción dun local social.

Loly Bolay reafírmase

Lonxe de detractarse das declaracións da última entrevista, Loly Bolay (Dolores Cruz Cousillas) reafírmase nunha nova entrevista despois de ser a primeira extranxeira elixida como presidenta do parlamento de Xenebra. Éste é un extracto da entrevista publicada hoxe pola Voz e realizada por Cristina Souto:

-¿Es su caso? ¿Sigue sintiéndose cormelana?
-Por supuesto, y mucho. Llevo dos años sin ir por Corme, pero me siento muy cormelana.

[…]

-Hace unos años aseguraba usted que Corme merece ser ayuntamiento propio, ¿sigue pensando lo mismo?
-Por supuesto, tiene que ser así. Yo recuerdo que ya mi padre y mis abuelos lucharon por eso. Es normal, porque Ponteceso tiene dos almas muy diferenciadas. No es normal que Corme no tenga su propio ayuntamiento.

-¿Cuándo volverá a Corme?
-Este verano, si todo va bien y la juventud de Corme me deja dormir. Los padres tienen el deber de educar a sus hijos. No es la sociedad quien tiene que educarlos. Cuando voy a Corme y a las tres o cuatro de la mañana veo críos que están en la calle, me pregunto dónde estarán sus padres. A esos progenitores habría que multarlos, porque sus hijos están molestando al prójimo. El único remedio que encontré fue no ir a mi pueblo, por el que siento mucha morriña.

-¿Esto no ocurre en Suiza?
-Claro que ocurre en Suiza, pero aquí los niños están educados desde muy pequeños. Cuando son niños es cuando hay que inculcarles las fronteras, hasta dónde pueden llegar. Ocurre, pero no tanto como en España.

O Acontecer, número 10

[Prema aquí para descargar O Acontecer, número 10]

A canalización do gas en Corme comezará en xaneiro

Según nos comunicou o encargado da empresa para Corme, as obras de canalización do gas comezarán o 7 de Xaneiro de 2008. Esperemos que non haxa máis retrasos, despois de que se lles concedera o permiso necesario para realizar as obras de canalización, por parte do Concello de Ponteceso.

[Fonte: corme.net]

Subvención para a AVV de Corme

A Deputación Provincial de A Coruña vén de conceder a cantidade de 3.000€ para actividades xerais da Asociación de Veciños “Eduardo Pondal” de Corme. Esta subvención corresponde ó ano 2007. Na mesma misiva, a Deputación pide disculpas polos retrasos que está habendo na concesión das subvencións durante este ano.

“Protestas en Tella”

Protestas en TellaComo moitas outras persoas ao longo da nosa democracia, formei parte da organización e participación de múltiples manifestacións, folgas e conflictos socio-político-laborais, en apoio de aquilo que cría de xustiza defender e procurando facelo dentro dun marco legal e transparente. Teño a certeza de que na gran maioría dos casos, cando se sae a rúa protestar, débese a motivos de auténtica magnitude, sempre provocados pola actitude dos poderosos. O concepto que teño destes é que fan uso e abuso dende o poder, son arrogantes, soberbios e carecen de todo principio humano -obviamente, coas naturais excepcións-.

Os políticos neste ránking atópanse á cabeza, pasan de ser o espello onde a sociedade debería reflectirse a ser como unha mancha que o salpica e ensucia todo. Uns non causan estrañeza, porque desde sempre están demostrando as súas dotes neste senso, os outros, despois de escoitar os seus pregóns e ver as súas actuacións, calquera calificativo é pouco para definilos. Por iso, cando un pobo como o de Tella ten a desgraza de sufrir a canallada de nos elevaren o nivel da estrada, deixando as nosas vivendas soterradas nun plano inferior ao do asfalto, con todos os prexuízos que eso entraña, ademais da merma do seu valor de mercado, non se poden facer unhas manifestacións de protesta na rúa tan de puntillas, educados e bos rapaces, como se tiveramos medo de ferir aos nosos políticos preferidos ou pensando que tal vez alguén se compadecería de nós. Defendemos os nosos dereitos, o noso patrimonio, polo tanto o paso debería ser firme e contundente, de acordo coa gravidade da situación, contra todos os badulaques, ata onde nos permita a lei, todo antes de deixalos pasar por riba das nosas propierdades.

No seu momento recordei aos presentes unha das reivindicacións máis importantes logradas neste pobo. Foi hai uns anos, coincidindo coas precampañas dunhas eleccións municipais. As condicións de habitabilidade do centro de EXB de Ponteceso, debido ao seu estado de deterioro e masificación, se fixeron insostible, urxía facer un novo edificio. Gobernaba na Xunta o PP, e no Concello o PSOE cando unha representación de pais solicitamos os primeiros contactos con eles. Nin nos miraban e non deixaron outra saída máis que as accións de protesta. Ás tres semanas de mobilizacións, a contratación do novo edificio escolar saíu publicada no BOE.

Aquí a clave estivo en que os pais e moitos máis cidadáns se solidarizaron e antepuxeron os obxectivos a calquera tipo de interese político, exercendo con toda clase política presente nas institucións as súas protestas de todo tipo.

Tal vez se fixeramos uso da memoria ou estiveramos máis atentos á nosa parroquia, en Tella, neste intre, en lugar de laiarnos, estariamos satisfeitos de impedir semellante atropelo e vilipendio, non poñeriamos entredito a quen cumpre co seu deber e, ademáis, conseguiriamos o respecto político presente e futuro, de cara a erradicar a marxinación que sofre este pobo.

Alberto Castro Lamas. PONTECESO

Carta publicada no día de hoxe no “Buzón del lector” do caderno local da Voz de Galicia que nos permitimos a licenza de publicar íntegramente.

Queda patente no pensar dos veciños que se cadra cunhas protestas máis enérxicas terían conseguido algo. Por contra, a día de hoxe teñen que tragar co mal menor da inoperancia dos políticos locais (dos tres partidos, sen escusas: PP, PSOE e BNG) ante o mal maior da mala idea dos políticos foráneos que han voltar nun futuro non moi lonxano co seu “bla, bla, bla” tentando confundir ós cidadáns de ben sobre feitos xa consumados na súa contra e na súa vontade.