Un pontecesán na Olimpiada Galega de Bioloxía

O vindeiro venres un estudiante de segundo de Bacharelato de Ponteceso participará, xunto con outros 62 alumnos da comunidade, na Olimpiada de Biloxía. Deberáse enfrontar a unha proba teórica de oitenta preguntas tipo test e unha práctica. Se se clasifica entre os tres primeiros recibirá un diploma acreditativo, unha cámara de fotos e unha bolsa de 600 euros para matricularse en calquera facultade de Galicia, amén de poder participar na fase nacional que se ha celebrar entre o 10 e 13 de abril en Gran Canaria. Se fora quen de quedar entre os catro primeiros clasificados podería acodir á Olimpiada Internacional de Bioloxía a celebrarse en xullo na India e, se quedase entre os finalistas participaría na Olimpiada Iberoamericana.

Novo ciclo de cine en Corme para xaneiro

Mañán escomeza un novo ciclo de cine en Corme organizado pola Asociación de Veciños, desta vez baseado nos filmes de Elia Kazan. A primeira pelicula, “Viva Zapata“, proxectaráse este venres ás dez da noite na Casa do Mar de Corme. As outras tres poderánse ver en venres sucesivos:

Películas familiares para o Nadal

O Concello escomeza as proxeccións de películas familiares neste Nadal en Corme. Será hoxe, día 27, con “Papá canguro 2” ás sete e media da tarde no pavillón municipal. Mañán será o turno de Ponteceso, na Asociación Cultural Río Anllóns, onde os cativos poderán desfrutar dos debuxos animados de “Ratatouille” a partires das sete da tarde.

Festas de Santo Tomé en Nemeño

Nemeño escomeza hoxe dous días de festa na honra de Santo Tomé. A verbena desta noite será por conta das orquestras Nova Palma e Olympus, e mañán os amenizadores serán os membros da agrupación Samba. Ambolosdous días oficiaráse misa solemne ás doce do serán na igrexa parroquial.

Clausuradas as Xornadas para o profesorado no Couto

Na tarde de onte púxose fin ás xornadas para o profesorado sobre do Himno galego que se estaban a celebrar na Casa dos Veciños do Couto. O catedrático Manuel Ferreiro, que segundo a AC Monte Branco é a persoa que máis sabe sobre Pondal, presentou unha nova edición do seu libro “De Breogán aos pinos” e ofreceu unha visión do himno galego dende o ano 2007. Tamén Xosé Barato, presentador de televisión, deu a súa interpretacion sobre da letra de Pondal. A xornada rematou coa interpretación do himno por conta da banda de música Eduardo Pondal de Ponteceso.

En días anteriores houbo intervencións a cargo dun feixe de estudiosos e persoeiros, coma Neira Vilas que na compaña da súa dona Anisia Miranda que anuncióu a súa intención de publicar un libro sobre o himno.

As xornadas tamén nos deixaron algunhas pezas impagables, como unha habanera creada con letra de Xosé María Lema Suárez e letra de Xabier Comesaña que ten por título “100 anos do himno galego”:

Baía da Habana
na beira do mar
ó ritmo das ondas
un galego soña
coa patria natal.

Cen anos hai, coa patria natal, cen anos xa.

“Tés, Patria, bandeira
azul e albar
Academia da fala
guardiá da palabra
¡só falta un cantar!”

Cen anos hai, só falta un cantar, cen anos xa.

“Un áulico canto
atruxo do clan
baril, rexo alento
xurdido do peito
da grei de Breogán”.

Grandiosa estrea
vinte de Nadal;
buligan as meigas,
coa música de Veiga
á oda de Pondal.

Na capital cubana,
Teatro Nacional,
resoan as notas,
nosa Galicia conta
cun himno inmortal.

Cen anos hai, cun himno inmortal, cen anos xa.

No Malecón da Habana
na beira doutro mar
quedaban as ondas
musitando a oda
cara a Galicia van.

Cen anos hai, e nós un cantar, cen anos xa.

Co de onte, remataban tres días repretos de actividades didácticas e culturáis ó redor do Himno e a figura de Pondal ás que acodeu un bo feixe de público, mesmo xente non pertencente ó profesorado. Achegamo-los nosos parabéns á AC Monte Branco, ó Concello de Ponteceso e a todos aqueles intervintes e organizacións que souberon levar con éxito a organización e execución do sinfín de propostas culturais que en Ponteceso se desenrolaron nestes días.

Cine de humor en Corme esta noite

Prosegue o ciclo de cine de humor en Corme. Esta noite proxéctase na Casa do Mar a partires das dez da noite o filme “Amanece que no es poco”, dirixido por José Luis Cuerda no ano 1988 e protagonizado por Antonio Resines, Cassen, Luis Ciges, Aurora Bautista, Enrique Sanfrancisco, José Sazatornil e Pastora Vega entre outros.

Sinopse: Teodoro é un xoven enxeñeiro español que traballa na universidade de Oklahoma e que decide regresar a España para desfrutar dun ano sabático. Ó chegar descobre que seu pai Jimmy matou á súa nai. Para compensalo mércalle unha moto con sidecar e, pai e fillo, adícanse a viaxar ata chegaren a un peculiar pobo no que cada ano se celebran eleccións para escoller, por votación popular, alcalde, cura, mestre, puta, marimacho e seis adúlteras.

XI Certame de Corais en Tella

O XI Certame de Corais vaise celebrar o vindeiro sábado 22 de decembro na igrexa San Eleuterio de Tella no que han participar as corais do concello de Ponteceso mailo grupo vocal Nois de Narón a partires das nove da noite. Prema na imaxe para acceder ó programa:

Proseguen as xornadas de conmemoración do Himno no Couto

Ás 18 horas Xosé Neira Vilas dará unha conferencia co título “A estrea do Himno galego en América no ano 1907″

Ás 19:15 horas háse presentar o caderno de viaxes “A Costa da Morte” de Anxo Fariña. Logo será a presentación da banda deseñada “Cerditos de Guinea” por Gochi.

Remata a xornada co concerto coral do Himno galego a cargo da coral polifónica da Estrada e a estrea da habanera “100 anos do Himno galego” con letra de Xosé María Lema Suárez e música de Xabier Comesaña.

Hoxe arrincan as Xornadas do Centenario do Himno no Couto

Esta tarde a partires das seis comezan as Xornadas de Conmemoración do Centenario do Himno Galego na Casa dos Veciños do Couto, organizadas pola Consellaría de Educación e maila AC Monte Branco, destiñadas ó profesorado e abertas ó público en xeral ata completar aforo.

Ás 18 horas será a exposición “Himno, os tempos son chegados” a cargo de M. A. Núñez Seixas,

Ás 18:15 horas membros de Reverso Servizos Lingüísticos proverán ós mestres de recursos cos que traballar cos seus alumnos sobre do poema de Pondal coa intervención “Nós temos letra. Proposta didáctica para o profesorado ao redor do himno”.

A partires das 20 horas ofreceráse un recital pondaliano no que intervirán os poetas Concha Blanco, María Canosa, Miro Villar e Alexandre Nerium.

Proxección do filme “Que veñen os rusos” en Corme

Prosegue o ciclo de cine de humor que a AVV de Corme organiza neste Nadal coa proxección esta noite ás dez da película “Que veñen os rusos” no ático da Casa do Mar.

Título: QUE VIENEN LOS RUSOS
Título orixinal: The Russians Are Coming, the Russians Are Coming
Dirección: Norman Jewison
País: Estados Unidos
Ano: 1966
Data da estrea: 04/09/1967
Duración: 120 min.
Xénero: Comedia
Calificación: Apta para tódolos públicos
Reparto: Brian Keith, Eva Marie Saint, Alan Arkin, Theodore Bikel, Andrea Dromm, Ben Blue, Carl Reiner, John Phillip Law, Jonathan Winters, Paul Ford
Guión: William Rose

Sinopse: Un submarino ruso encalla nun tranquilo lugar da costa de Nova Inglaterra nos Estados Unidos e os seus tripulantes vense na obriga de sairen ó exterior na procura de axuda. Algúns dos tripulantes achéganse ata un pequeno pobo para acada-los materiais precisos para a reparación da nave… o malo é que os habitantes da habitualmente tranquila aldea coidan que están a tratar de os invadir.

Asemblea da Fundación Torre-Pujales

Hoxe reúnese en asemblea o patronato da Fundación Torre-Pujales en Corme para dilucidar sobre diversos temas como o peche de contas, valoración das actividades realizadas no presente ano así como decidir cándo escomenzarán as obras do futuro Museo de Arte Contemporánea despois da axuda de 80.000€ concedida por Agader e do prazo máximo de seis meses que lle outorga a licenza para leva-las a cabo.

“Quero ser grande!” na AC Río Anllóns

Continúa o XIV Ciclo de Teatro organizado polo Concello de Ponteceso con fondos da Deputación: hoxe sábado día 1 de decembro Talía Teatro escenificará “Quero ser grande!” a partires das dez e media da noite no local da Asociación Cultural Río Anllóns con entrada de balde.

Talía Teatro nace no ano 1988 no Concello de Cee como grupo de teatro afeccionado vinculado á asociación Cultural Domingo Antonio de Andrade, entidade organizadora da Mostra de Teatro de Cee.

“Quero ser grande!” é unha peza dirixida por Artur Trillo e na que actuarán Marta Ríos, Rosi Barcala e María Ordóñez, unha obra coa na que durante case unha hora darán unha visión ácida e cómica da infancia, onde se pode constatar a distancia que separa os grandes dos pequenos.

Sinopse: Talía Teatro achégannos esta visión do mundo aceda e cómica sobre a infancia, onde se pode constatar a distancia que separa aos grandes dos pequenos: malos entendidos cos pais, as cousas que fan que teñamos gana de facérmonos grandes e outras que mais ben dan gana de quedar pequenos…. Elaborado a partir de seis sketchs, e co humor como elemento básico, trata de entreter e interesar a un público falto de espectáculos que falen da súa realidade. Unha reducida, pero significativa galería de personaxes fala dos seus temores, dos seus complexos, dos seus obxectivos futuros, das súas rebeldías familiares… creando un amplo espectro de situacións que teñen como eixo fundamental o eterno inconformismo adolescente.

Obra dirixida preferentemente a maiores de 12 anos.

[Prema aquí para descarga-lo programa do XIV Ciclo de Teatro]

Peche de inscricións nas Xornadas sobre o Himno

Hoxe remata o prazo de inscricións nas Xornadas do Centenario do Himno Galego que se han celebrar na Casa dos Veciños do Couto do 18 ó 20 de decembro e que tiveron unha grande acollida desbordando tódalas espectativas.

“Só te teño a ti” na Casa do Mar de Corme

Hoxe ponse fin ó Ciclo de Cine Social organizado pola AVV Eduardo Pondal de Corme coa proxección do filme “Só te teño a ti” a partires das dez da noite na Casa do Mar, con entrada de balde.

Agader subvenciona con 80.000 euros ó Museo de Arte Contemporánea

Información publicada na noite de onte en Corme.net:

A Axencia de Desenvolvemento Rural, dependente da Consellería do Medio Rural da Xunta de Galicia, vén de conceder o pasado 26 de Novembro unha subvención por importe de 80.000 euros para a rehabilitación da casa museo que a Fundación Torre-Pujales ten na Rúa Real. Esta subvención é crucial para a posta en marcha do Museo de Arte Contemporánea da Costa da Morte.

“Pim Pam Pum” na A.C. Río Anllóns

O vindeiro sábado, dentro do XIV Ciclo de Teatro que organiza o Concello de Ponteceso (Concellaría de Cultura), poñerase en escea a obra “Pim Pam Pum” da compañía Mona Lisa Teatro.  Ás 22:30 horas na Asociación Cultural Río Anllóns.
 

Sinopse argumental

Disparatadas historias? Un xogo de nenos? Un absurdo? Ou a crúa e tola realidade? Xulguen vostedes mesmos, pero por favor, rían e desfruten do espectáculo, que para chorar sempre hai tempo.

Solicitude masiva para participar nas Xornadas sobre o Himno

A avalancha de solicutudes para participar nas Xornadas sobre o Himno que se impartirán do 18 ó 20 de decembro no Couto os organizadores decidiron amplia-la matrícula ata o venres da vindeira semana e traslada-las sesións do salón principal á galería da Casa dos Veciños. Con todo, o aforo máximo será de 150 persoas polo que se lle dará prioridade ós profesores de maoir proximidade xeográfica.

“Chovendo pedras” na Casa do Mar de Corme

Continúa esta noite o Cliclo de Cine Social da AVV de Corme co filme de Ken Loach “Chovendo pedras” que se proxectará ás 22:00 horas na Casa do Mar con entrada de balde.

“As últimas lúas” na AC Río Anllóns de Ponteceso

Co marco do XIV Ciclo de Teatro de Ponteceso que organiza o Concello, escenificaráse mañán sábado a partires das 22:30 horas na Asociación Cultural Río Anllóns a obra “As últimas lúas” da compañía Lagarta Lagarta fundada polos coñecidos actores Ernesto Chao e Rosa Álvarez.

Cunha duración estimada de cen minutos a obra está destinada preferentemente para público adulto.

Sinopse:

“As últimas lúas” é obra do autor italiano Furio Bordón e foi representada en teatros de toda Europa e América. Representa a historia dun profesor de literatura, xa xubilado, que abandoa a casa na que vive coa familia para trasladarse a unha residencia de anciáns. O vello coida que fillos e netos han tentar que cambie de idea pero, para a súa sorpresa, todos toman a idea con inusitada ledicia.

Obra: Le ultime lune, de Furio Bordón
Compañía: Lagarta Lagarta
Traducción e adaptación: Cándido Pazó
Dirección: Xulio Lago
Elenco: Ernesto Chao, Rosa Álvarez e Artur Trillo

Magosto en Corme

Dentro do progama de actividades culturais do Outono do Concello de Ponteceso, o Departamento de Cultura organiza unha xornada adicada ó Magosto en Corme, o vindeiro 9 de Novembro (Venres) ás 22.00h no pavillón municipal de Corme.
 
XOGOS POPULARES:
Na cultura galega estanse recuperando infinidade de xogos tradicionais que o paso do tempo, o abandono do rural polas cidades e as os vertiginosos avances tecnolóxicos foron desprazando ata o esquecemento.
 
Para abrir o apetito polas castañas antes do gran banquete realizarase unha sesión de xogos tradicionais onde os máis maiores lembrarán os xogos da súa infancia e os pequenos aprenderán outras formas de diversión máis activas que as que imperan hoxe en día.
 
FESTA RACHADA:
Despois dos xogos, unha vez entrado en calor, un grupo tradicional de gaitas e percusión tirarán de repertorio de música galega tanto instrumental como cantada para animar ás e ós asistentes a botar uns bailes.
 
CASTAÑAS E CHOCOLATE PARA TODOS:
Mentres a xente se entrega con paixón ó baile farase unha fogueira para en canto haxa unhas boas brasas poñer a asar as castañas.
Unha vez as castañas estean listas repartiranse entre as e os asistentes e en compañía da música tentaremos acabalas todas con máis bailes, xogos e festa rachada. Tamén haberá chocolate quente.