Os rogos do PSOE de Ponteceso

Os tres concelleiros do PSOE veñen de presentar un rogo polo que solicitan o cambio de hora do vindeiro pleno. No presente mandato o goberno local trocou o horario ás nove da mañán cando ata agora se viñeran celebrando á tardiña.

Tamén preguntan os socialistas ó goberno se a instalación do transformador en Corme Porto ven propiciada para paliar deficiendas no suministro ou só para alimenta-la depuradora que ha ser instalada en Corme. De ser esto último, pregúntanse tamén cal é o problema técnico existente para que non se instale a carón da propia depuradora.

Por último, esixen que lle sexa requerido a Intervención que lles den acceso ás facturas impagadas nos catro anos precedentes.

Expostas ó público as listas electorais

As listas electoráis estarán expostas ó público no Concello de Ponteceso ata o vindeiro luns para que poidan ser consultadas por todos aqueles interesados a efecto de que poidan ser presentadas reclamacións. Deberáse presenta-lo DNI ou calquera outro documento identificativo e o horario é de nove da mañán a dúas da tarde. Tamén se poden facer consultas chamando ó 901 101 900.

Liorta a conta dun transformador eléctrico en Corme

A última desputa política vén de producirse co gallo da ubicación dun transformador eléctrico en Corme e ten coma protagonistas ó goberno local, PP, e ó BNG pontecesán.

Postura do Bloque, nun escrito presentado no Concello:

Afirman os nacionalistas que o alcalde enganou ós veciños cos que se reuniu o pasado venres xa que lles dixo que a ubicación do transformador dependía da Consellería de Industria cando o certo é que é o Concello o que lle propón á empresa eléctrica o sitio para a instalación e a Consellería só se encarga de outorga-la licenza. Pregúntase o BNG se a obra ha servir en realidade para mellora-lo suministro ou se, pola contra, ten algo que ver coa vindeira construcción da EDAR de Corme e con afollarlle custos ás empresas.

Interésanse tamén os edís do Bloque polas contraprestacións económicas que recibiría o Concello pola instalación do artefacto nun espacio público, do mesmo xeito que preguntan se non habería outras ubicacións mellores coma ó lado da Fonte da Ribeira, a pa da caseta da máquina do carro varadeiro, nun terreo colindante co da EDAR ou solicitando a FENOSA que alugue unha das casetas do peirao propiedade de Portos e que se atopan libres.

Resposta do alcalde na prensa:

Fondo Aguiar afirmou estar sorprendido polas acusacións do BNG e adicouse a desbaratalas todas. Sobre os terreos que se decidiron ceder afirmou que eran os únicos que dispón o Concello na zona e que contaron co beneplácito dos técnicos. Tamén asegurou comprende-la preocupación polos posibles perxuizos que as obras poderían causar nas casas próximas e que por iso se está a negociar agora un emprazamento alternativo con outras Administracións.

O alcalde tildou de “absurdas” as dúbidas do Bloque sobre da finalidade do transformador e acusounos de procurar somente “xaleo para que Corme siga con problemas eléctricos xusto agora que”, segundo di, “estamos moi preto de solucionalos”.

Qué aconteceu no pleno extraordinario de onte

O pleno de onte, celebrado de forma extraordinaria co gallo do orzamento municipal para 2008, despachouse en pouco menos de tres cuartos de hora, dende as nove da mañán, resultando na aprobación dos mesmos cos votos do grupo de goberno en solitario na maioría dos apartados.

O contido dos presupostos detallabávamolo polo miúdo en 500P.com o pasado mércores e pode vélo premendo nesta ligazón.

Quen amosou unha oposición máis rotunda ós orzamentos foi Manuel Varela, do BNG:

Non podemos apoiar un orzamento cunhas adicacións exclusivas que non están a facer nada. Ademáis, o Concello pasa a ter unha débeda a longo prazo considerable, que ronda os 600.000 euros.

De feito, a débeda é duns 300.000 euros pero a longo prazo o Concello suma unha débeda de 622.000 euros con entidades bancarias. Ademáis Varela botou a faltar nos orzamentos proxectos coma a escola de música de Corme, centro de día, polígono industrial ou polideportivo en Ponteceso.

Na réplica a Varela, o alcalde Fondo Aguiar asegurou que se ten firmado en datas recentes un convenio de colaboracións para a renovación de pluviais e o peche total do polígono. En canto ó centro de día matizou que é unha obra que se fará aínda que non se reflicta no orzamento e para o que xa se teñen solicitado axudas tanto á Deputación coma á Xunta. Tamén puntualizou o alcalde que hai solicitado un novo obradoiro de emprego para os traballos na sede da escola de música de Corme. Sobre o déficit dixo Fondo que se tenta equilibrar o presuposto por canto o déficit orzamentario se ten baixado moitísimo nos últimos anos. Por último detallou o alcalde que dende o 26 do presente mes, e por espacio de dúas a tres semanas, vaise por en marcha un plan experimental de comedor sobre rodas no apartado de servicios sociais.

Mato Pet e outros concelleiros do PSOE matizaron o seu voto, tamén negativo:

As facturas pendentes de pago para nós tamén son pasivo. Vai moi pouco para inversións, só se limitan a cubrir gastos, ademáis de ser excesivo que cáseque o 50% se destine a salarios.

A esto o alcalde respostou sen miramentos:

Ponteceso ten poucos ingresos e recursos escasos, polo que lle volvo a pedir ao portavoz socialista que pague algún imposto no concello anque só sexa o do coche.

Finalmente, Pet tentaba defenderse da acusación:

Eso non é totalmente certo porque teño propiedades aquí. Se non pago o imposto de circulación en Ponteceso, sendo máis barato, é pola ineficiencia da administración local cando tentei facelo.

Trocos nas ordeanzas fiscais:

Modificouse a ordeanza reguladora da plusvalía (incremento do valor do solo urbán) aumentando o período que se ten en conta para determina-la tasa, se ben o tipo do gravame se mantén. Deste xeito os promotores inmobiliarios tamén terán a obriga de pagar. Foi rebaixada a bonificación para a transmisión de herdanzas entre familiares que estaba no 50% e queda no 95%. Sobre estes puntos tanto PSOE coma BNG abstivéronse.

Modificouse a ordenaza reguladora do imposto sobre construccións, instalacións e obras que pasan de gravarse do 2,5% ó 3% para igualarse ó resto de concellos da volta. Dende agora tamén se ha cobrar pola expedición de licencias un 0,2% do seu valor. A oposición votou en contra e o BNG explicaba a súa negativa:

Aumentar as tasas non é o camiño axeitado para buscar máis ingresos.

Foi aprobado un recoñecemento extraxudicial de crédito de 54.000 euros por facturas atrasadas de electricidade e combustible, cifra que se ha sustraer de partidas do apartado de persoal con remanente debido a que non se cubriron as prazas previstas. O BNG votou a favor e o PSOE abstívose.

Aprobouse por unanimidade das forzas a solicitude de axuda á Deputación para a inclusión do Cairo de Corme no programa provincial de campos de fútbol con herba sintética.

Anécdota: Polo visto Suso Lista, do BNG, non puido acodir ó pleno seica por mor de aproveita-la marea para apañar percebes a esa hora da mañán. Lista é percebeiro de profesión.

Repetimos que para acceder con moito máis detalle ós orzamentos aprobados debe pasarse pola nosa anterior entrada clicando aquí.

Pleno extraordinario a conta dos presupostos de 2008

O vindeiro venres 21 de decembro háse celebrar no Salón de Plenos do Concello un pleno extraordinario para aprobar os presupostos xerais para o 2008, a partires das nove da mañán.

Agárdase a aprobación dun falso superávit de 301.626 euros, correspondente na realidade ó déficit do Concello, nun balance resultante de 4.340.577 euros de ingresos por 4.038.950 euros de gastos.

Antecedentes:
Cabe salientar que no ano 2004 o desfase aprobado ascendía a 1,4 millóns de euros e no exercicio 2007 computábanse uns 9000.000 euros.

No apartado de inversións, dentro do presuposto de gastos, o montante ascende a 603.495 euros. No pasado exercicio a cifra ascendía a 1,2 millóns de euros nos que estaban incluídos o obradoiro de emprego para a rehabilitación da sede da Fundación Eduardo Pondal, as obras da gardería municipal ou o centro socio cultural.

Actuacións que se enmarcan nos presupostos como inversión:

Céspede artificial no Cairo

O proxecto está orzamentado en 375.000 euros dos que ó Concello lle corresponde afronta-lo quince por cento, uns 56.250 euros, despois de que a masa social do Corme CF aceptace cederlle o campo temporalmente ó Concello para a solicitude da axuda á Deputación.

Centro multiusos

Destiñaránse 81.079 euros para a nova anualidade do centro socio cultural e maila biblioteca municipal fronte ós 192.573 dos presupostos de 2007. Para a adquisición de fondos bibliográficos hánse reservar 1.200 e 3.000 euros.

Acceso ó colexio As Forcadas de Corme

Orzamentaráse con 30.000 euros o arranxo dos accesos ó colexio As Forcadas de Corme que na actualidade se atopan sumamente deteriorados.

Pavimentacións do POS

Sobre do 45% das inversións corresponden ó Plan de Obras e Servizos no que se inclúen melloras viarias por valor de 277.405 euros que pode ver polo miúdo premendo aquí.

Festas e cultura

- 6.000 euros destiñaránse para o mantemento da Fundación Pondal.
- 3.000 euros para a Fundación Torre-Pujales.
- 1.800 para as festas de Corme.
- 2.100 para A Barquiña de Ponteceso.
- 480 para a Festa do Percebe e a Motofesta.

Taxas

Inclúense na orde do día varios puntos relativos a ordeanzas fiscais como a aprobación inicial da nova normativa sobre da taxa por expedición de licenzas urbanísticas que se ha fixar nun 0,2% do montante total da licenza en cuestión. Tamén se abordará a modificación do imposto de plusvalía así coma un recoñecemento oficial de créditos de facturas atrasadas que ascenden a 54.000 euros.

Outros gastos

Baixo este epígrafe pódense englobar a reserva de 24.000 euros para a adquisición de terreos, 20.000 euros para obras de depuración e saneamento así coma 100.000 euros para proxectos de obras municipais.

O BNG esíxelle ó Concello que se acolla ás axudas para formación en novas tecnoloxías

O BNG de Ponteceso vén de esixirlle ó Concello que realice as xestións oportunas para contar con unha das trinta prazas dinamizadoras da sociedade da información que a Consellaría de Industria vai poñer a disposición de concellos e asociacións para formar ós veciños no eido das debanditas novas tecnoloxías da comunicación e información.

O PSOE de Ponteceso critica a futura área metropolitana

En declaracións á Voz de Galicia, o PSOE de Ponteceso vén de critica-las supostas vantaxes da futura área metropolitana da Coruña que probablemente abrangue Carballo e A Laracha:

Hai que escapar de comarcalizacións, áreas metropolitanas ou delimitacións da Costa da Morte que impidan o crecemento global da zona. A inclusión de Carballo e A Laracha na área metropolitana deixaría a concellos como Ponteceso, Cabana, Malpica, Coristanco ou Laxe nunha posición de menor crecemento respecto ós seus veciños.

Pola contra, aseguran defender unha unidade comarcal centrada en Ponteceso como referente en formación profesional:

Ponteceso reúne tódalas condicións: instalacións fácilmente adaptables, cercanía a vase tódolos puntos vitais do entorno e disposición dos habitantes do concello, ávidos de ver o seu municipio desenvolvido nun conxunto coordinado de crecemento total, escapando do separatismo.

Réplica do alcalde ás acusacións do PSOE

Continúa a desputa verbal entre o PP e o PSOE de Ponteceso estes días na prensa por mor do estado e reparación do Colexio Público Eduardo Pondal. Se na última ocasión os socialistas acusaban ó Concello de non facer nada pola escola agora tócalle ó alcalde respostar con todo o que se fixo polo colexio pola súa banda:

Salvo a substitución da cuberta e da carpintería exterior, que correron por conta de Educación, todo o demáis afrontouse con cartos das arcas municipais: os servizos sanitarios e o alicatado do patio; a substitución da caldeira que se puxo totalmente nova; pintado de todo o centro; substitución da iluminación interior e novos puntos de luz no exterior; econdicionamento do xardín e zonas verdes; construcción dunha nova rampa de acceso; acondicionamento e equipamento dunha zona de xogos infantís e dunha pista polideportiva descuberta; novas zonas de embarque e desembarque; melloras dos accesos; reposición de portas; eliminación de zonas cheas de pedras no exterior; arranxo das oficinas xerais e de dirección.

O actual director do colexio foi cabeza de lista e concellal do PSOE durante moito tempo e el foi un dos que quixo que o mellor era facer un novo colexio porque deficiencias coma a eliminación de barreiras arquitectónicas eran imposibles de solucionar.

Mandamos escritos conxuntos ós sucesivos delegados, tanto do PP como ó anterior do PSOE, e ao que hai agora tamén lle pedimos que polo menos arranxaran a calefacción.

Agora parece que xa non fai falta un colexio novo, que xa non hai problemas de barreiras arquitectónicas, nin fai falta ascensor, nin arranxar a cuberta. Con tantas necesidades que había antes, ata o punto de que había que tirar con todo, sorpréndeme moito que agora o director se conforme con poñer catro radiadores, consumo dos cales, por certo, terá que pagar o Concello.

Antes o delegado de Educación era do PP e non do PSOE como agora. Só así se explica este sorprendente cambio de opinión cando antes o director estaba aquí tódolos días pedindo que presionaramos ó delegado porque o colexio era unha ruina e había que tirar con el.

Fondo Aguiar anunciou que nos próximos días ha facer públicas as cifras concretas dos cartos investidos no colexio público por parte do Concello.

Entre pitos e frautas, os corenta anos que teñen enriba as instalacións non llas quita ninguén…

Novo comunicado do PSOE

Desta vez, a conta da calefacción do Colexio Público Eduardo Pondal. Na nota difundida polos socialistas acusan ó Concello de despreocuparse polo mantemento do centro xa que, polo que aseguran, estivéronse a anula-los radiadores cando se avariaban nas aulas dos máis pequechos para os que finalmente se instalaron radiadores eléctricos de baixo consumo. En resposta ó alcalde, quen subliñou en días pasados que “fraco favor fixeran as xestións do PSOE porque o gasoe da calefacción o paga a Xunta pero a electricidade corre por conta do Concello”, os socialistas afirman na nota que non é moito gasto catro calentadores de 800 vatios e que o aforro que iso supón debería investirse no colexio en lugar de lle subi-lo soldo ós concelleiros do PP.

Resposta do alcalde ó comunicado do PSOE

En resposta ó comunicado difundido polo PSOE co gallo do abandoo do pleno e no que se acusaba ó alcalde de dictador logo de rexeita-las súas mocións e preguntas, Fondo Aguiar ratificouse afirmando que as iniciativas do PSOE non foran presentadas coa antelación acordada. Tamén lles reprochou que desen voto a favor da urxencia da mocion do BNG sobre o cambio climático xa que, segundo el, é un contrasentido:

O señor Santos votou a favor da urxencia cando ata o de agora era un dos comerciantes que pedía ó Concello que o alumeado se encendese o máis axiña posible. Eu xa non entendo nada.

Comunicado do PSOE sobre o abandono do pleno

O PSOE de Ponteceso ven de difundir un comunicado para xustifica-lo abandono do pleno o pasado luns despois de que o grupo de goberno aprazase as preguntas e mocións dos socialistas para un vindeiro pleno excudándose en que non as tiveran presentado a tempo. No comunicado acusan ó alcalde de tentar silenciar á oposición e de “poñerlle soldo a seis concelleiros se logo é el quen quere controlar todo.

Lamentamos que o PSOE local non nos teña en conta para nos remitir información nin comunicado algún polo que só podemos por os extractos que do debandito comunicado publicou a prensa no día de hoxe:

En democracia ten que existir diálogo e ter en conta á oposición.

As mocións deberían terse debatido e aprobado para poñerse canto antes a traballar para non seguir co retraso que levamos desde que vostede é alcalde.

O alcalde non se aclara porque di que antes o PSOE non presentaba mocións e agora que as presenta non as contesta. Antes dicía que as preguntas tiñan que ser por escrito, agora son por escrito e tampouco as contesta. Ao alcalde non lle interesa que se saiba nada do Concello, nin que os veciños asistan aos plenos, por iso os puxo ás 9 da mañán.

Abandoamos o pleno porque entendemos que se non se contestan as nosas preguntas non estamos nunha democracia, estamos nunha dictadura.

Sobre o acontecido no pleno de onte

Aprobouse o Plan de Obras e Servizos (POS) para o 2008 coa abstención de PSOE e BNG, ainda que se enclúen algunhas das propostas do Bloque, cos seguintes proxectos de pavimentación vial:

• En Langueirón, dende a estrada xeral ata o igrexario, 52.831 euros
• En Cores, camiño de Santa Cruz a estrada de Cruceiro e camiño de Fonte das Pombas, 34.214 euros
• En Corme:
  • De Aldea do Roncudo ata zona alta de Regadiña, 52.492 euros
  • De A Pedra á rúa Boqueta Carril, con valado, 53.352 euros
  • Tramo Atalaia - estrada do Roncudo e do camiño Cruceiro a Fonte dos Ánxeles (Brántuas), 36.520 euros
• En Niñóns, camiño de Canleiro e, en Brántuas de Abaixo, camiño de Rocheira, 47.990 euros

O alcalde salientou como razoables as propostas do BNG por seren obras prioritarias malia ser imposible metelas todas no POS mentres que calificou de “panfleto” as do PSOE por, segundo Fondo Aguiar, non se adaptaren nin ás bases nin ós cartos dispoñibles xa que sería preciso un millón de euros para levalas a cabo. Os socialistas respostaron que debería le-las bases da convocatoria para saber qué obras se poden incluír e as que non e lembrou que algunhas das súas propostas xa foran incluidas noutros plans co seu voto a favor.

Aprobouse a modificación dos estatutos da Fundación Eduardo Pondal por unanimidade despois de que a secretaria explicara que se trataba dunha cuestión de formas para adapta-lo regulamento á nova Lei de Fundacións de Interese Galego.

Aprobáronse por unanimidade as propostas para apoia-la candidatura da Torre de Hércules a ser proclamada Patrimonio da Humanidade ó igual que achegarlle os parabéns a Dolores Bolay por ter sido elixida presidenta do parlamento de Xenebra.

O asunto da permuta inmobialiaria aprazouse ata un vindeiro pleno por non teren presentado os promotores toda a documentación a tempo.

Mocións

A moción do BNG sobre o cambio climático, que incluía medidas de aforro enerxético e a elaboración dun plan específico así como retrasa-lo prendido do alumeado do Nadal, foi rexeitada aducindo que o Concello se atopa vinculado xa a plans de outras administracións e que mesmo os comerciantes piden que se adiante o encendido do mencionado alumeado.

Outra moción do Bloque en apoio ás reivindicacións dos veciños de Tella foi aprobada por unanimidade polo que os tres grupos lle expresarán a súa oposición á Consellería de Política Territorial sobre da pavimentación recén realizada e pediránlle que rebaixe o nivel da estrada á altura das casas así como a construcción de beirarrúas de verdade. O alcalde asegurou que deberían expropia-la marxe dereita en dirección Carballo coa fin de cederlla ó Concello para facer beirarrúas e aparcamentos.

En canto ás mocións do PSOE, Fondo anunciou que as mocións e preguntas deste grupo habían quedar para o vindeiro pleno ordinario por teren sido presentadas o venres e non poder te-las miradas ata o día de onte (chegou a asegurar que se enterou das mesmas pola prensa), reprochándolles que xa tiña advertido no pleno anterior que a oposición debería presentarlle as mocións e preguntas con maior antelación a fin de darlle tempo dabondo para examinalas e prepara-las respostas. Foi entón cando os tres ediles socialistas abandoaron o salón de plenos en sinal de protesta. O portavoz do grupo, Mato Pet, declarou o seguinte:

O Goberno tenta poñer trabas á oposición cos horarios dos plenos e actitudes como ésta. O sábado é día hábil e cúmprense as vintecatro horas de rigor. Ademáis, o alcalde cobra un bo soldo, teñen tres dedicacións exclusivas e cada membro do goberno percibe 612€ ó mes, polo que aínda que teñan que facer algunha hora de máis non é tanto esforzo.

O PSOE retirándose do pleno [FOTO: cibeira - lavozdegalicia.es]

Rogos e preguntas

Respostas ós interrogantes plantexados polo BNG:

Sobre a construcción do centro de día, o alcalde asegurou que o Concello se interesou por contar con esta instalación a través de contactos coa Xunta e coa Deputación ós que se lle ofreceron terreos sitos entre o centro de saúde e o intituto, estando a día de hoxe á espera de novas por parte de Vicepresidencia da Xunta, quen por boca de Carmen Aldán, secretaria xeral de Igualdade, fixo saber que ofrecerían resposta a curto prazo.

Sobre a Galescola, Fondo Aguiar rexeitou responsabilidades no retraso na súa apertura.

Anunciouse que a casa de cultura deberá estar rematada a mediados de 2008.

Sobre os sendeiros litorais, o alcalde indicou que Ponteceso foi incluído no proxecto do Ministerio de Medio Ambiente cun tramo entre A Barra e Anllóns. Cando Suso Lista se interesou polo proxecto anunciado por Touriño sobre o tramo costeiro de Muros e Laxe e unha posible inclusión de Ponteceso, Fondo aclarou que polo de agora só é unha simple declaración de intencións e que en caso de concretarse solicitaráse que conten con Ponteceso.

En canto ó segundo médico de Corme, o alcalde explicou que mantivo xuntanzas cos veciños e coa delegada provincial así como o envío de escritas á consellería recibindo por toda resposta que non hai médicos dabondo.

Sobre as obras do gas en Corme e a preocupación dos veciños que xa adiantaron cartos á empresa, Fondo aclarou que a concesionaria solicitou dous permisos: un para a canalización e outro para o depósito, ámbolosdous concedidos se ben o do depósito depende agora das Consellerías de Industria e Medio Ambiente.

Explicouse que as obras de sendas peonís e bairrarúas ata o Pinguel que está a construir a Deputación non inclúen rede de saneamento pero que o Concello prentende poñer canalización ata a curva da Agra de Lestemoño sen que sexa preciso que a obra afecte ós traballos que se están a realizar na actualidade.

O alcalde tamén informou que as obras da EDAR de Corme serán contratadas antes de que remate o ano e as de mellora da de Ponteceso xa foron adxudicadas.

Onte, día de visitas en Ponteceso

Sobre a visita de Pablo Vvillamar, vicepresidente da Deputación da Coruña

O vicepresidente da Deputación achegouse na tarde de onte ata Corme e reuniuse cos dirixentes da Confraría para facer entrega de 38.000 e 5.000 euros para a posta en marcha da venda de percebe por internet. O patrón maior indicou que estudiarán xunto ca Universidade da Coruña e coa empresa Abertal de Carballo para comercializa-lo percebe na rede, despois de teren rexistrada a marca Percebe do Roncudo e estaren traballando nun proxecto de etiquetado e deseño dun logotipo. A Deputación tamén fixo entrega de outros 17.000 euros complementarios para tentar salva-lo pósito da quebra económica despois de quedaren cun só vixiante e teren que face-los propios mariscadores turnos de vixiancia.

Logo Villamar achegouse ó Couto para ve-las obras da que será a Futura sede da Fundación Eduardo Pondal na remozada casa rectoral e anunciou que estará listo en febreiro tras un investimento de 300.000 euros dos que 240.000 corresponden ó Plan de Dinamización Turística e o resto ó Concello.

Sobre a visita de José Luis Barcia, delegado de Industria

Tamén na tarde de onte o delegado de Industria, xunto con representantes de Xestur, achegáronse ata o polígono industrial da Mezquita de Tella para unha xuntanza coa xunta de propietarios na que constatou a necesidade dunha ampliación do parque industrial, mellora-lo suministro eléctrico en varias parcelas da parte traseira do polígono, voltar a medir e dar nova división a dúas ou tres parcelas que ainda están por vender e nas que a superficie real non coincide coa do proxecto, así como a construcción dun local social na parcela propiedade da entidade. O delegado amosouse receptivo ás demandas e comprometeurse a estudia-la posibilidade de subvenciona-las obras precisas a cargo do orzamento da consellería do vindeiro ano.